Hurricane Irma-in Florida a thleng

Thlipui na tak, Hurricane Irma chuan Carribean bial a nuai hnuah, nimin khan US-a Florida state a thleng a, thlipui tleh tur avang hian state chhunga cheng hmun thuma hmun khat, mi maktaduai 6.3 chuang zet chu insaseng tura hriattir lawk an ni.

Hurricane Irma tleh avang hian nimin khan Florida state chhunga in 170,000 chuangin power supply an nei lo. Naples khaw daia North Collier Regional Park chu thlipui hlaua tlanchhiate awm lailawkna turin ruahman a ni a, he hmunah hian mi tam tak an tlan lut a ni. Florida Governor Rick Scot chuan thlipui tleh dawn vanga insawnchhuak tura tihte chu thupek zawm turin a ngen a ni.

Hurricane Irma hi Carribean-a a tleh ṭum hian kum 100 hnua thlipui tleh tawh zinga na ber nia sawi a ni a, thlipui hlauhawm zawng tehnaa a hlauhawm ber Category 5 a ni a, mahse a hnuah Category 3-ah tla thlain, Florida lam a pan lai hian Category 4-ah a chho leh a ni. Carribean-ah hian thlipui tleh avang hian mi 25 an thi a ni. British territory, Anguilla-ah chuan thlipui tleh hian sorkar building leh sumdawnna hmun 90% a nuai chhia a, electricity infrastructure 91% vel a tichhe bawk. Barbuda thliarkara in awm zinga 90% vel a len chhe bawk a ni. 

British Virgin Island-ah pawh in tam tak a lenchhia a, emergency agency chuan chhiatna an tawh mek chu rukruten remchangah an hman a hlauhthawnawm thu sawiin, security an mamawh hle tih an sawi. Cuba-ah pawh Caibrien khua-a block pathum chu tuiin a chim a, thlipui tleh hian provincial museum a tichhe bawk. Mi 880 chu hmun him lamah sawn­chhuah an ni. Puerto Rico-ah chuan thlipui tleh avang hian mi maktaduai khat vel chu power supply nei loin an awm. St Martins leh St Barts thliarkah chuan thlipui tlehin a thil tihchhiat hut zawng hi dollar tluklehdingawn 1.44 chuang hu nia sawi a ni a, St Martins-a chenna-in 70% vel chu thli hian a tichhia a ni.

Thlipui hian ruahtui a ken tel avangin Florida khawthlang lam tuipui kamah chuan tui a len mai a hlauhthawnawm bawk.