Rohingya pawlten inkahhai puang

Myanmar-a Rohingya Muslim insurgent-te chuan Rakhine state-a mi tam takin harsatna an tawh mek tihziaawm nan thla khat chhung atan inkahhai an puang.

Arakan Rohingya Salvation Army (Arsa) chuan nimin aṭang khan inkahhai hi an puang tih an sawi a, Myanmar sipaite pawh hemi chhung atan hian an ralthuamte dahthla turin an ngen.

Arsa hian August 25 khan border police-te an bei a, hei vang hian sipaite hian beihpui an thlak zui ta a ni. Sipaite beihpui thlak avang hian Ra­khine state-a Rohingya 290,000 vel chu Bangladesh ramah an tlanchhe tawh a ni.

UN chuan Myanmar aṭanga tlanchhia, Rohingya Muslim-te chhawmdawlna atan hian chhawmdawl hna thawktute chuan dollar matkaduai 77 an mamawh niin an sawi. Bangladesh-a Rohingya raltlante hi Cox’s Bazaar-ah an awm a, ral­tlante hian ei tur, tui thianghlim leh health service an mamawh hle niin UN chuan a sawi.

Rohingya-te chuan sipaite hian an khuate beiin, an in te an halsak niin an sawi. Mahse Myanmar sorkar chuan sipaite hian firfiakte chauh an bei niin a sawi thung. Arsa-in inkahhai a puan chungchang hi Myanmar sorkar chuan a la chhang lo.

Bangladesh official-te chuan Bangladesh rama Rohingya tlanchhiate chu Myanmar rama an kir tawh lohna turin Myanmar sipaiten ramri bulah chilpuah/rahpuah bomb an kam niin an sawi. Mahse hei hi Myanmar sipaite chuan thu dik lo niin an sawi thung.