Hurricane Irma : Florida-ah mi mtd 3 chuangin power nei lo

Hurricane Irma chuan Pathianni khan US-a Florida khawthlang lam tuipui kam a nuai a, mahse thlipui hlauhawm lam hi Florida a thlen hian Category 3 aṭangin Category 2-ah a tlahniam hman a ni.

Irma-in Florida khawthlang lama Marco Island a thlen hian darkar khata km 192-a nain a tleh a, hemi hnu hian thli hian kawng thlakin, Florida khawchhak lam pan loin khawthlang lam a pan a, thli nat lam pawh hi a tlahniam a ni. Thlipui tleh hian crane a len thluk avangin Florida-a mi maktaduai 3.4 chuangin power supply an nei lo a, thli hian ruahtui a ken tel avangin Miami khawpui hmun ṭhenkhat chu tuiin a chim bawk.

Miami International Airport chu nimin khan khar a ni a, Orlando International Airport chu kar kalta Inrinni aṭang khan khar a lo ni tawh bawk a, thlipui tleh hi a reh fel hma chuan khar rih a ni ang.

Florida-a thlipui tlehin chhiatna a thlenah hian mi panga an thi tawh a, an zingah hian law enforcement official pa­hnih an tel.

Hurrican Irma hian Florida state a thlen hmain Carribean bial a lo nuai tawh a, thlipui tlehin chhiatna a thlen hrang hrangah mi 28 an thi a ni. Florida lam a thlen hma hian thuneitute chuan mi maktaduai 6.3 vel chu venthawn thilah insaseng turin an lo hriattir lawk a ni.

US President Donald Trump chuan Hurricane Irma-in a kawng thlak a, khawthlang lam a pan chu an vanneih phah niin a sawi a, thliin a kawng a thlak avang hian chhiat­na pawh a thlen nasat loh phah a ni, a ti. Thlipui tleh avang hian sum tam tak hloh mah se, mihring nunna chu a pawimawh ber a nih thu a sawi. President Trump chuan Florida chu chhiatna nasa tak, major disaster thlenna state-ah a puang a, hemi hmang hian sorkar laipui pawhin Hurricane Irma tuar counties pakua, Charlotte, Collier, Hillsborough, Lee, Manatee, Miami-Dade, Monroe, Pinellas, leh Sarasota hnenah chhawmdawlna a pe thei dawn a ni. Sorkar laipuiin chhawmdawlna a pek turah hian an awm lailawkna tur siamsak te, in chhia thawm ṭhat sak te, insure loh in chhiate te tana a pung tlem zawka loan pek bakah, sumdawngte leh mimalte ṭanpuina tur program siamte a tel a ni.