Muslim ramten Myanmar dem

Muslim ram intelkhawm, Organisation of Islamic Cooperation (OIC) chuan Myanmar rama Muslim Rohingya-te rawnga taka beihna thlengah Myanmar sorkar an dem thu a sawi.

OIC chuan Myanmar sorkar hnenah a ram chhunga thil thleng enfiah tura international monitor luh remti turin a ngen bawk. United Nations chuan Myanmar security force-te’n Rohingya helte laka beihpui an thlak hnuah Rohingya muslim mi nuai thum dawn chu Bangladesh ramah an tlanchhe tawh niin a sawi.

Member 57 awmna, OIC chuan Astana-a meeting an neihnaah Myanmar sorkar an demna thu hi an sawi a, Myanmar sipaite avanga Rohingya te chunga tawrhna thleng mek chu ngaihven a ngai hle niin an sawi. OIC president ni lai Turkey President Recep Tayyip Erdogan chuan Rohingya chungchanga Myanmar policy kalpui dan chu na takin a lo sawisel tawh bawk a ni.

Myanmar ramah hian Rohingya hi maktaduai khat chuang an awm a, mahse heng mite hi Myanmar sorkar chuan dan loa an rama lutah puhin, khua leh tui nihna pawh a pe duh lo a ni.