NKorea-in hrekna thar siam chhan letah vau

North Korea chuan an ram hrekna thar siam a nih chuan US chu na taka chhan letah a vau.

Nimin khan UN Security Council chuan US-in rawtna a siam angin North Korea hrekna thar siam chungchang a ngaihtuah a ni.

North Korea Foreign Ministry chuan thuchhuah siamin, US chetdan chu ngun takin an thlithlai reng a, a ṭul dan anga chhang turin an inpeih tih a sawi.

NKorea-in nuclear test a neih leh avangin US chuan kar hmasa Thawhlehni khan UNSC-ah NKorea hrekna na tak siam a rawt a, rawtna a siam zingah hian NKorea tana oil leh natural gas hralhchhuah ṭhin khapsak vek te, NKorea hotu Kim Jong-un leh sorkar in ramdanga thil an neih zawng zawngte khawih chet theih loha dahsak vek te a tel a ni.

Hetih lai hian NKorea ram ṭhianṭha, China chuan NKorea hrekna thar siam lo a, nuclear program a kalpui mek titawp tura inbiakna neihpui phawt a duh thung a, NKorea hrekna thar siam rawt chungchang hian Pathianni thleng khan US nen pawh an la sawidun a ni.

NKorea Foreign Ministry thuchhuah chuan, an ramin mahni invenna atana a hmalakna te chu US chuan an ram che thei loa siamna remchangah hman a tum a ni, a ti. US chu thisena tuihal, NKorea hmasawnna turte dansak vek tumah a puh.