Russia-ah indo duh lohna lantirtu mi ṭhahnem tak man an ni
Russia-in Ukraine-ah sipai nuai chuang tir belh a, nasa zawka beihpui thlak a tumna duh lotu mi tam takin Russia ram hmun hrang hrangah nawrh an huaihawt a, an zinga mi ṭhahnem tak chu police-ten an man.
Russian human rights group OVD-Info chuan police-ten mi 1,300 chuang an man niin a sawi a, heng zinga a tam zawkte chu St Petersburg leh Moscow-a mite an ni. Irkutsk leh Siberian khawpui dang bakah Yekaterinburg-ah pawh man an nei nual a ni.
Ningania Putin-a'n sipai chakna hmanga nasa zawka beihpui thlak a tum tih a sawi hnuah Russia chhuahsan tur flight ticket pawh an hralh zo chak hle.
Russia President chuan Ukraine ram an laksak tawh an hloh leh mek avangin beihpui nasa zawkin an thlak leh dawn a, sipai reserve pawh nuai thum vel indonaah koh belh an ni dawn tih a sawi. Hei hi duh loin mi tam takin lungawi lohna an lantir zui nghal a ni.
Moscow prosecutor office chuan phalna nei loa kawtthlera nawrh huaihawt emaw, an zinga tel ve emaw chu kum 15 thlengin lungin tantir theih an nih thu a sawi. Heng mite hi Armed forces sawichhiaa puhna leh, thu dik lo thehdarha puh chungchangah thubuai siamsak theih an ni ang.
Hetichung hian indo duh lotu pawl, Vesna erawh chuan nasa zawka lungawi lohna lantir turin mipuite a sawm thung.
Russia leh Ukraine-in tang 300 dawn inthleng
Russia leh Ukraine-te chu thla sarih dawn an indo tawh hnuah, engmah puangzar lawk loin tang 300 dawn an inthleng.
Tang an inthleng zingah hian United States, United Kingdom leh Morocco mite pawh telin, an zinga ṭhenkhat chu Ukraine rama man an nih hnuah thi tura an chungthu relsak tawhte an ni.
Russia chuan Ukraine mi a man zinga 215 an chhuah a, an zingah Ukraine chhim lama lawngchawlhna khawpui Mariupol venhim hna thawktu commander panga pawh an tel. A chhanletna atan Ukraine chuan Russia mi 55 a mante chu a thawn let ve bawk.
Tang inthleng tura inremna hi Saudi Arabia leh Turkey ramte puihnain an siam a ni.
"Kan ram leh khawtlang tan hnehna ropui tak a ni. A pawimawh ber zawka chu chhungkaw 215 ten an hmangaihte dam taka an chenna ina an hmu leh thei hi a ni," tiin Ukraine president Zelenskyy chuan a sawi a, Turkey president Recep Tayyip Erdogan puihna avangin lawmthu a sawi nghal bawk.