UNSC-in NKorea hrekna thar thlawp

United Nations Security Council chuan North Korea ram hrekna thar siam chu a thlawp a, NKorea-in a ṭum rukna atana nuclear test a neih leh avangin an ram hrekna na zawk hi siam a ni.

US-in NKorea hrekna tura rawtna a siam chu UNSC member-te chuan lungrual takin an thlawp a, China leh Russia pawhin an thlawp a ni. Hrekna thar siam zingah hian textile product leh oil product thawnluh khapna te a tel a ni.

UN-a US ambassador Nikki Haley-i chuan NKorea ram hrekna na zawk siam thar chuan khawvelin nuclear programma a kalpui mek a pawmpui thei dawn lo tih hriattirna a ni, a ti. Hemi rual hian indo chu an duh ber a ni lo tih a sawi a, NKorea pawh inlamlet thei lo khawp dinhmunah ala ding lo a, a nuclear program tihtawp a remtih chuan hmalam hun eng tak a la nei thei a ni, a ti. Boruak muanawm tak hnuaiah a awm thei tih a lantir chuan, ramdangte nen pawh boruak ṭha tak hnuaiah an awm thei dawn a, mahse kawng hlauhawm zawk a thlang lui zel a nih chuan na zawka an nawr chhunzawm zel tur thu a sawi bawk.

South Korea chuan UNSC-in resolution a siam chu lawmawm a tih thu a sawi a, he resolution hian NKorea chu harsatna siam zawnga a kal lui zel a nih chuan an ram hrekna a zual zel dawn tih a hriattir a ni, a ti.

UNSC resolution siam thar hian North Kora ram tana textile product leh natural gas thawnluh a khap bakah, refined oil product thawnluh turah pawh bithliah a siamsak a, ram hrang hrangte chu North Korea mite hnena work permit pe thar lo turin a tibawk. NKorea mi 93,000 vel chu ram pawn lamah hnathawkin an awm mek a, heng mite hian an ram sum lakluhna kawngah nasa takin an pui a ni. Textile export khap a nih avang hian North Korea chuan kum khata a sum lakluh ṭhin aṭangin dollar maktaduai 726 vel a hloh phah dawn niin, US official chuan a sawi. Khapna dang siamte nen chuan NKorea-in kum khata a sum lakluh zat a hloh tur hi dollar tluklehdingawn 1.3 vel a tling pha dawn nia sawi a ni.