Raltlan naupang mtd 3.5-in school kal lo

United Nations refugee agency, UNHCR chuan khawvel ram hrang hranga raltlan naupang zing a zahve aia tam, mi maktaduai 3.5 vel chuan school an kal thei lo niin a sawi. Heng miten lehkha an zir theih nana fund tam zawk pe turin a ngen nghal bawk.

UNHCR report tihchhuah­ah hian, nikum khan raltlan naupang maktaduai 6.4 vel an awm a, heng mite hi kum 5-17 inkar niin an zinga maktaduai 3.5 chu ni khat pawh school kal thei loin an awm niin a tarlang.

UNHCR enkawlna hnuaiah hian raltlan maktaduai 17.2 vel an awm mek a, an zinga a zahve dawn hi naupang an ni tih, agency hotu Filippo Grandi chuan a sawi. Khawvel pumah naupang 91% -te’n primary school an kal laiin, raltlan zingah primary school kal chin chu 61% an ni a, kum 2015 khan 50% an ni. Naupang zingah 84%-in secondary school an kal laiin, raltlan zingah chuan 23% chauh a ni. Raltlan zinga 28% chu ram rethei zawka awm an ni a, heng hmunah hian naupang school kal zat a hniam hle a, 9% vel chauh an tling pha a ni.