Catalan independence rally huaihawt

Spain aṭanga Catalonia bial independence thlawptute chuan Thawhṭanni khan Barcelona-ah kawng an zawh a, Catalan parliament-in independence duh leh duh loh chungchanga mipuite vote lakna tur bill a pass chu an thlawpna an lantir a ni.

Catalan sorkar chuan October 1 hian mipui vote lak a tum a, hei hi Spain sorkar laipui chuan dankalh tiin Constittutional Court-ah a khing a, court chuan Catalan parliament bill pass hi a lo hnawlsak tawh a ni. Mahse Catalan sorkar hotute chuan vote lak hi kaltlangpui an tum tho tih an sawi.

Mipuite vote lakna tur, referendum neihna tur hmanrua, printing press-a siamte chu tunhnaiah Spain Guardia Civil police-te chuan dapin eng emaw zat an mansak tawh bawk.

Thawhṭanni, September 11 kha Catalan bial national day ‘Diada’ a ni. Kum 1714, September 11 khan War of Spains Succession-ah Catalan sipaite chu Spain sipaite laka tlawmin, Barcelona chu Spain kutah a awm a ni.