Suu Kyi-in UN General Assembly kal tur a ṭhulh

Mynamar State Counsellor Aung San Suu Kyi-i chuan New York-a UN General Assembly hmanga kal a tum chu a ṭhulh.

Suu Kyi-i party, National League for Democracy (NLD) thupuangtu chuan Thawhlehni zan khan Suu Kyi-i’n September 20-a meeting neih tura a tel tur chu a ṭhulh tih a sawi a, mahse a ṭhulhna chhan erawh a sawilang lo.

Myanmar khawthlang lam, Rakhine state-a sipaite beihpui thlakna avanga Rohingya Muslim tam tak thah an ni leh, ramdanga tlanchhiat ngaia an awm avangin Suu Kyi-i hian sawisel a tawk fo a, Rohingya-te’n harsatna an tawh mek chung­changa aw chhuah duh lo leh inrawlh duh loha puhin an sawisel fo a ni. Sawiseltu ṭhenkhat chuan Nobel Peace Prize a lo dawn tawh pawh laklet sak turin an nawr hial a ni. August 25 aṭang khan Rohingya Muslim 370,000 chu Bangladesh ramah an tlanchhe tawh a ni.

Hetih lai hian Myanmar thuneitute chuan security force leh Buddhist mite chu Rohingya civil mite chunga harsatna thlentu an nih loh thu sawiin, a mawhphurtu ber chu Rohingya helpawl an nih thu an sawi thung. Buaina chhuah hnu hian Buddhist mi 30,000 dawn chu himna zawngin an tlanchhia niin an sawi.

NLD thupuangtu Aung Shin chuan Suu Kyi-i zin ṭhulh chhan hi sawilang lo mah se, Rohingya chungchang avanga beih leh sawisel a hlauh vang a ni lo tih a sawi. Shin chuan, “Suu Kyi-i hian harsatna thleng chungchangah sawisel leh chhuahchhalh a hlau ngai lo. Ram chhunga tihtur pawimawh a nei zawk vang a ni”a ti.

Suu Kyi-i aiah hian Myanmar vice president Henry Van Thio chu UN assembly-ah hian kalin, Myanmar aiawhin thu a sawi zawk dawn a ni.

Nikum September thla khan Suu Kyi-i hian UN General Assembly-ah Myanma ram hruaitu a nih angin a ṭum khatna atan thu a sawi a, Myanmar sorkarin a ram chhunga Muslim minority-te harsatna sukiang tura hma a lak dante a sawi a ni.