Myanmar ramah Chhiatna aṭangin chhiat lehzualna a thleng : UN

United Nations human rights special rapporteur Tom Andrews chuan Myanmar-a cheng mi maktaduai 54 te dinhmun chu nikum February 1-a civil sorkar paihthla a, sipaiten thuneihna an hnehchhuh aṭang khan chhiatna aṭangin chhiat lehzualna a thleng tawh tih a sawi.

Geneva-a UN Human Rights Council-a thu a sawiah, Andrew chuan nikuma Myan­mar sipaiten thuneihna an hnehchhuh hnuah ram dang aṭanga hmalaknate chu a hlawhchham a, Myanmar sipai hian pawi khawihin, mihring dikna an palzut a, heng zingah hian civil mite chunga mipat hmeichhiatna hmanluihna te, innghaisakna leh inthahna te a thleng fo a ni, a ti.

Andrews chuan Sagaing khaw hmar lamah sipaiten heli­copter aṭanga helpawl birukna hmun nia sawi, school an beihna a naupang 11 an thih hnu lawk, Nilaini khan council hmaah thu hi a sawi nghal a ni. Sipaiten thuneihna an hnehchuh hnuah mi 2,300 chuang an thi tawh a, mi sang tam tak an man tawh tih Assistance Association for Political Prisoners chuan a tarlang bawk.

Sipaiten an hren zingah hian naupang 295 an tel thu leh, politics thil avanga tang mi 84-te chu tihhlum hmabak an nih thu Andrews chuan a sawi bawk a ni.

Tun kar tir khan, Myanmar-a mihringte dikna palzut dan zirchiangtu zinga an hotu pawhin Human Rights Coun­cil hnenah Myanmar-a pawi­khawihna chu nasa takin a darh mek zel tih a hrilh.

Sipaiten thuneihna an chan hnuah khawthlang ramte chuan senior general leh sipai thawhpuitute hrekna an siam tawh hlawm a, sipaite sumdawnna ṭhenkhat pawh hrekin, Myanmar rama sumdawng lian eng emaw zat an inlachhuak tawh bawk.