Iran-a buaina chhuakah mi 31 an thi tawh

Iran-a moralitiy police-ten a incheidan chungchang avanga hmeichhe kum 22 mi an man, Mahsa Amini thih danah lungawi loin Iran ram hmun hrang hrangah nawrh huaihawt zel a ni a, buaina chhuakah mi 31 vel an thi tawh niin Oslo-a hmunpui nei NGO chuan Ningani khan a sawi. Mahsa Amini hi morality police-te kuta a awm lai hian a thi a ni.

Iran mipuite chuan an dikna chanvo leh zahawmnate humhalh duhin hmun hrang hrangah lungawi lohna an lantir a, heng mite hi sorkar lam chuan silai mu nen a lo hmachhawn a ni, tiin Iran Human Rights (IHR) director Mahmood Amiry-Moghaddam chuan a sawi.

IHR hian ram chhunga khawpui 30 leh urban centre dangahte ni ruk chhung nawrh huaihawt a ni tawh tih sawiin, nawrh huaihawt zinga tam tak man an ni tawh bawk a ni, a ti. Kar liam ta khan Kurdistan province hmar lama Amini chenna aṭangin lungawi lohna hi lantir ṭanin, tunah chuan rampum a kangkai tawh a ni.