Iran-in nuclear ralthuam a siam chuan sipai chakna hman a ngai : Israel PM
Israel prime minister Yair Lapid chuan United Nations hnenah Iran ramin nuclear ralthuam a siam chuan khawvel ramdangte'n sipai chakna hmangin hma an lak nghal a ngai tih a sawi. Hemirual hian boruak ṭha tak hnuaia Palestinian ram siamna tur chu a thlawp thu a sawi nghal bawk.
Israel hian tun hnai chhoah 2015-a Iran nuclear deal lo siam tawh chu tharthawh tawh lo turin US, Britain, France leh Germany-te hneh tumin hma a la a ni.
Ningania UN General Assembly-a thu a sawiah, Lapid chuan, "Iran-in nuclear ralthuam a siam tur danna awmchhun chu sipai hmanga vau hi a ni," a ti. Hemi hmang chauh hian inremna tlo leh chak zawk sawipui theih a ni ang, tiin a sawi.
Iran hnenah hian nuclear programme a kalpui zel a nih chuan, khawvel chuan thu mai ni loin, sipai chakna hmangin a chhang let dawn tih hi chiang taka hrilh an ngai tiin Israel PM chuan a sawi. An ram tana a him lo nia a ngai a nih chuan, Israel chuan hma a la nghal dawn tih a sawi bawk.
Israel leh US-in Red Sea-ah Joint naval drill nei zo
Israel leh United States-ten Red Sea-ah indo nunchanna,joint naval drill an neih chu Ningani khan an zo.
Israel chhim lam, Gulf of Eilat-a neih zawh tak hi a hmingah "Digital Shield" exercise tih an vuah a, Israeli Navy leh Middle East-a naval U.S. force, U.S. Fifth Fleet aṭangin sipai leh officer-te an tel a ni.
He drill hi "ram pahnih sipaite inkara thawhhona ṭha leh tuipuia sipaite inhriatthiamna thuk zawk siam a, artificial intelligence ṭangkai taka hmanchhuah theih dante enchhinna tura buatsaih a ni," tiin Israel sipai thuchhuah chuan a tarlang.