NKorea-in Japan leh US a vau

North Korea chuan nuclear ralthuam a enchhin leh avanga UN Security Council-in an ram hrekna thar a siam an thlawp avangin Japan leh US a vau leh.

North Korea state agency, KCNA chuan vauna thu hi tichhuakin, nuclear ralthuam hmanga Japan ram chu tihpil vekah a vau a, hei bakah US pawh meivap-a chantirah a vau bawk.

NKorea external policy chungchang buaipuitu, Korea Asia-Pacific Peace Committee chuan Security Council-in hrekna thar a siam chu hmanraw ṭha lo tak a ni tih sawiin, he hrekna hi US-in a tham ramten US thupek angin an siam mai a ni, a ti.

Japan chu UNSC resolution a thlawp avangin nuclear bomb hmanga tuipuia tihpil vekah a vau a, Japan chu an ram bula a awm ve reng a ṭul tawh lo tih committee chuan a sawi. September 3-a NKorea-in nuclear test a neih leh hnu khan a ṭhenawm ramte nena an inkar boruak hi a chhe zual a ni. Committee chuan US chu meivap-a chantirah a vau bawk.

Japan ram chu US thu ang anga awm­ah puhin, Indopui laia Japan-in an ram mipuite chunga pawikhawihna nasa tak a thlen chungchanga tun thlenga ngaihdam a dil loh avangin Japan ram chu ngaihdam theih a ni lo tih a sawi bawk. South Korea pawh bei telin, US tana thawktu, US ui ang maiah a puh bawk.

Japan Chief Cabinet Secretary Yoshihide Suga chuan NKorea vauna chuan boruak chhe zawk a thlen phah thei dawn tih a sawi a, an ram a vauna chu a pawm thei dawn lo tih a sawi.