Daca Dreamer chungchangah Trump leh Democrats-te inrem

US President Donald Trump-a’n naupan laia dan loa US-a lutte humna, Deferred Action for Childhood Arrivals (Daca) programme a tihtawp avanga document nei loa US-a lut ṭhalai tam tak, an rama thawn kir an nih lohna turin inremna an siampui thei ta niin Democrats chuan an sawi.

Daca programme hnuaiah hian naupang an nih laia ramdang aṭanga US-a pem lut, document nei lote chu hum an ni a, lehkha zirna leh hna thawhna tur permit te pek an ni. Hetianga lutte hi Dreamer an ti a, he programme hi president hlui Barack Obama hunlaia siam niin, Dreamer 800,000 vel zet chu he programme hnuaiah hian hum an ni.

Mahse September 4 khan President Trump chuan Daca programme hi a tihtawp tur thu a sawi a, a thlakna tur ngaihtuah turin Congress chu thla ruk hun a pe bawk. Trump chuan Daca chu tihtawp ni mah se, Dreamer te dinhmun chu a ngaihtuahin a ngaihsak thu a sawi.

Democrats hruaitu pahnih, House Minority Leader Nancy Pelosi leh Senate Minority Leader Chuck Schumer-te chuan US-a pem lut ṭhalai tam tak thawn kir an nih lohna turin President Trump hi inremna an siampui thei ta niin an sawi. Democrats chuan President Trump-a’n Mexico ramri hungna bang siam a tum chu an theih anga dan an tum thu an sawi bawk.