Al-Qaida-in Myanmar vau

Al-Qaida firfiak pawl chuan Myanmar rama Rohingya Muslim-te’n security force-te kut an tawrh chung­changah Myanmar sorkar chu vauin, an thiltih avang hian hremna an hmuh let ngei dawn tih an sawi.

Security force-te’n beihpui an thlak avang hian Rohingya Muslim 400,000 vel chu Bangladesh ramah an tlanchhe tawh a ni. Heng mite hi Myanmar khawthlang lam, Rakhine state-a cheng an ni. Myanmar sorkar chuan Rohingya-te hi an ram mi angin ala pawm thei lo a, full citizenship pawh ala pe duh lo a ni.

Rohingya helten police leh army post an beih avang­in security force-te chuan Rohingya helte lakah beihpui an tlak a, civil mi tam takin an tuar tel a ni. Security force-te beihpui thlak avanga Rohingya civil mite chunga tawrhna nasa tak thleng hi ram hrang hrangten an dem a, Myanmar sorkar chu a sipaite chetdan chung­changa aw chhuah lo leh inrawlh duh lohah an puh.

Al-Qaida chuan thuchhuah siamin, khawvel ram hrang hranga Muslim-te chu Myanmar rama an unaute hi chhawmdawlna leh ralthuam hmanga pui turin an sawm. Rohingya Muslim-te chunga rawng taka thiltitute chu hrem lohin an chhuak tur a ni lo, an ti. Muslim mite tawrhna ang chu Myanmar sorkar pawhin a tawh ve a ngai a ni tih an sawi bawk.

Hetih lai hian Myanmar sorkar chuan Rohingya firfiakte lakah beihpui thlak a nih thu a sawi a, police, army leh civil mite beitu pawh firfiakte hi an nih thu a sawi.