WHO-in nakkum kum tir hmain Covid-19 vaccine peih hman ring lo

World Health Organisation (WHO) expert-te chuan ram hrang hranga mi thiamten Covid-19 vaccine hmuhchhuah tuma hma la mek hlawm mah se, vaccine chu nakkum kum tir hma chuan an peih fel hman a beiseiawm loh thu an tarlang. 

Covid-19 vaccine peih fel hman tur hian mihringah enchhinna neih chhoh mek a ni a, a siam chhuak hmasa nih tumin an intlansiak mek a ni. "Vaccine siamchhuah tumna kawngah hian khawvela mi thiamte an ṭang hle a, trial hi ṭhenkhat chuan phase thumna an kalpui mek bawk. Hma pawh an sawn chho hle a ni. Chutih rualin he vaccine hi kumina peih fel hman beisei a ni lo a, mahse nakkum kum tir lamah mi thiamte chuan an peihfel hman kan ring tawh a ni," tiin WHO health emergencies programme head Dr Michael Ryan chuan a sawi. 

Hmanhmawh taka siam zawh zung zung theih a ni dawn lo a, mipuite himna ngai pawimawh chunga he vaccine hi siam mek a ni tih Dr Ryan chuan a sawi. "Covid-19 hri kai tihdamna tur kan mamawh rual hian a damdawi tur siam mek vaccine hi mipuiten hmang ta se a him angem, an tana ṭhat lohna a thlen phah thei a ngem tih ngaihtuah chunga siam a ngaih avangin hmanhmawh theih a ni lo," tiin Dr Ryan chuan a sawi bawk.  

Pfizer Inc leh German biotech BioNTech siam, Covid-19 vaccine chu peih fel a nih hunah US chuan dose maktaduai 100 a hauh nghal a, hemi atana pawisa pawh US dollar vaibelchhe 95 ruahman a ni tawh bawk a ni. 

Dr Ryan chuan school hawn tum chungchangah pawh fimkhur tura chahin, community transmission thunun a nih theih hma chuan zirna in hawn chu hmanhmawh lo turin a ti.