Myanmar inthlanpuiah Suu Kyi-in a chuh leh dawn

Myanmar ram hruaitu Aung San Suu Kyi-i chu an ram danpui hnuaiah president dinhmun chelh thei lo mah se, kumin November 8-a  inthlanpui an neih turah a chuh leh dawn tih a party, National League for Democracy (NLD) thupuangtu chuan a sawi. 

NLD thupuangtu Zaw Myint Maung chuan party Central Executive Committee meeting an neih hnua chanchinbu mite a kawmnaah, Suu Kyi leh President Win Myint-te chuan inthlan hi an chuh leh dawn tih a hrilh a ni. 

Sipai rorelna hnuaia an awm laia danpui siam hnuaiah, ram dang mi nupui/pasala nei a, fa neite chu an ram President-ah dah theih an ni lo. Suu Kyi hian British mi pasala neiin fapa pahnih an nei a, a pasal hi kum 1999 khan a thi tawh a ni. Hei vang hian kum 2015 inthlanpui neiha NLD in chiang taka hnehna chang a, sorkarna an siam pawhin Suu Kyi hi President-ah a awm thei lo a, NLD sorkar chuan a chanvo tur siamchawpin Counsellor-ah a dah a ni.

Sipai rorelna paihthla a, mipui rorelna din tuma hma a lakna kawngah fak hlawh hle mah se, Suu Kyi hi thuneihna an chan hnuah Rakhine state-a Rohingya hnam laka sipaiten beihpui an thlak chungchang sorkarin a dan zawh loh avangin sawisel a tawk nasa hle. 

Myanmar ram inthlanpui hi November 8 hian neih a ni dawn a, September thla tir aṭangin campaign neih ṭan a ni ang. Inthlanah hian Parliament in hniha member 664 aṭangin 24% chu sipai chanpual a ni a, a bak member 498 tur chu mipuiten an thlang dawn a ni. NLD hian Parliament in hniha majority nei tur chuan inthlan neihna tur seat hmun thuma ṭhena hmun hnihah hnehna an chan a ngai a ni.