Bangladesh-in Rohingya refugee-te khuahkhirhna siam

Bangladesh sorkar chuan an rama Rohingya ratlan lutte khuahkhirhna a siam a, an awmna tura ruat chin bak chhuahsan lo turin a ti.

Myanmar rama Rohingya hel leh Myanmar sipaite inkara inbeihna thlen hnuah, Rohingya mi nuai li chuang zet chu Bangladesh ramah hian an tlanchhe tawh a ni. Raltlan lutte hi sorkarin border district-a camp a siam hrang hrangah dah an ni. Bangladesh sorkar chuan raltlante hi an awmna camp tura ruat bakah kal lo turin a ti a ni.

Police thupuangtu, Sahely Ferdous chuan raltlante hi an rama an kir leh theih hma chuan an awmna tura ruat camp-ah hian an awm chhunzawm zel tur a ni,a ti. Rohingya-te chu an chhungte leh ṭhiante in lam pan lo turin a ti a, hei bakah hian tual­chhung mite pawh raltlante hi an in luah tir lo turin a hriattir bawk. Police-te chuan motor, rel leh lawng hmanga hmun danga kal lo tura hriattirin, bus leh lorry driver-te pawh Rohingya mite phur lo turin an ti.

Police-te chuan raltlante hian an camp chhuahsan a, ramchhung hmun dang an pan tur veng turin check post te pawh an siam vek niin an sawi. Raltlan lut an pun zel avangin an awmna tur camp hi a siambelh mek a ni bawk.

Bangladesh in Rohingya raltlante awmna tura a siam, Cox’s Bazar-ah chuan raltlan an pung chak hle a, raltlante chhawmdawlna pek kawngah Bangladesh sorkar chu ruahmanna fel tak siam loa puhin sawisel a tawk fo a ni. Hetih lai hian Bangladesh sorkar chuan Myanmar hnenah Rohingya raltlante hi hruai kir turin a ngen.

Bangladesh Prime Minister Sheikh Hasina chu UN General Assembly neih tur­ah raltlan pung chak zel avanga harsatna an tawh mek chungchanga ramdangte puihna dil tur leh, Myanmar sorkar nawr tura ngen turin kal kalta Inrinni khan New York a pan.