London leihnuai relah bomb puak

Kar kalta Zirtawpni khan London-a leihnuai relah bomb a puak a, mi 30 in hliam an tuar

Bomb puahna hmun hi Parsons Green subway station a ni a, bomb puak hi tualchher bomb (homemade bomb) a ni. Bomb puah hnu hian kangmei a chhuak zui a, hliam tuar zinga a tam zawk pawh kang hliam a ni. Bomb hi a puah kim loh avang­in chhiatna nasa zawk a thleng lo nia sawi a ni.

London police-te chuan pawikhawihtute hi zawng nghalin, Inrinni khan rinhleh thilah Dover port-ah mi pakhat an man a, hemi zan hian Hounslow-ah midang pakhat man a ni bawk.

Islamic State (IS) firfiak pawl chuan London-a bomb puak hi an tih niin an chhal a, intelligence official-te pawhin he pawikhawihna thlengah hian firfiakte hi an inhnamhnawih tih fin­fiahna rintlak tak a awm niin an sawi bawk.

Prime Minister Theresa May-i chuan London-a pawikhawihna thleng hi hlauhawm tehnaa a sang ber niin a puang a, pawikhawihna dang a thlen leh mai venthawn thilah silai keng police leh sipaite chu khawlaiah venhim han thawk tura tirhchhuah nghal a ni a, firfiakte pawikhawihna dang thleng thei dinhmun an ding tih a sawi bawk.