US-a sorkar hnathawkte tan TikTok khap dawn
US Senate Homeland Security and Governmental Affairs Committee chuan Nilaini khan sorkar hnathawk (federal employees) te tana Chinese app, TikTok hman khapna tura Republican Senator Josh Hawley bill put luh chu lungrual takin an pawm.
Hawley put luh bill hi US Senate-ah vote lak a ni leh ang. TikTok app khap an tumna chhan hi an ram security venthawn thil vang a ni. He app hmangtute personal information chu China sorkarin he app kaltlang hian an hriatruk theih an hlauh vangin US chuan khap hi a tum a ni. TikTok app chungchangah hian US secretary of state Mike Pompeo chuan a hma pawhin America mipuite chu fimkhur turin a lo chah tawh a ni.
Thawhṭanni khan House of Representatives-ah sorkar hnathawk te tana TikTok hman khap rawtna siam chungchangah vote lak a lo ni tawh bawk a, khap duhtu pawl lamah hian vote 336 a tla a, duh lo lamah hian vote 71 a tla thung a ni. President Donald Trump kaihhruai sorkara thuneitu sang lamin sorkar hnathawkte chauh nilo, ram pum huapa TikTok hman khap tumin an inrawn mek niin media-te chuan an tarlang bawk.