Brazil President la dam lo

Covid-19 a kai avanga enkawl mek, Brazil president Jair Bolsonaro chu a ṭum thumna atan test a nih leh hnu pawhin a la positive chhunzawm zel. 

July 7 khan President Bolsonaro hian corona­virus a kai thu hi a puang a, a inkhung hrang nghal a ni. July 15 khan a sample test leh niin a la positive a, July 22-a test leh a nih pawhin a la positive zel a ni. Sorkar thuchhuah chuan President hi a hriselna dinhmun a ṭha a, a ngaihtuahawm loh tih a sawi. Mahse inkhung hran a la ngaih avangin in lam aṭangin hna a la thawk chhunzawm zel, meeting pawh video conference hmanga a neih a la ngai a ni. Hri a kai vang hian Brazil rama a zin tur pawh a ṭhulh a ngai dawn ta a ni.

President Bolsonaro cabinet minister pali pawhin Covid-19 hi an kai tih hmuh chhuah a ni tawh bawk. Brazil ramah hian hri kai hi an la pung chak hle a, hri kai hmuh chhuah tawh hi mi 22,27,514 awm tawhin an zinga mi 82,771-in an thihpui tawh a ni. Hetih lai hian hri kai hmuh zinga mi 15,91,975 chu an dam tawh thung. Khawvel ram hrang hrang zingah US dawtah hri kai tamna ber ram a ni mek a ni.