Russia sipai, Ukraine kuta inpete ṭha taka enkawl an ni dawn : Zelenskyy

Ukraine president Volodymyr Zelenskyy chuan Russia sipai, Ukraine kuta inpete chu ṭha taka cheibawl/ enkawl an ni dawn tih a sawi.

Russia president Vladimir Putin-a'n Russia sipai, thupek awih loh leh zawm lote hremna chu a leta tihnatna tur dan siama a hming a ziah hnan hnu lawkah Zelenskyy chuan hemi chungchang hi a sawi a ni.

Zelensky chuan Russia sipaite chu inpe tura ngenin,"Kan ralthuam hmanga thih ai chuan Ukraine kuta inpek chu a ṭha zawk a ni," a ti. Russia sipai inpete chu ṭha takin, danin a phut angin enkawl an ni ang a, an duh lo a nih chuan Russia ramah pawh thawn kir an ni lo ang, tiin a sawi.

Hetihlai hian Putin chuan Russia sipai, thupek awih loh leh zawm lote hremna tihnatna tur, thupek zawm lote kum 10 thleng tan tir an nih theihna tur dan chu Inrinni khan a pawmpui ve thung.

President Putin-a'n Ukraine lakah beihpui nasa zawka thlak a, sipai nuai 3 tirh belh a tum thu a puan hnuah, Russia khawpui hrang hrangah indo duhloten lungawi lohna an la lantir chhunzawm zel. Inrinni khan nawrh huaihawt zinga 700 vel chu man an ni a, a hmain mi 1,000 chuang man an lo ni tawh bawk.