North Korea-in ballistic missile kap chhuak leh
North Korea chuan Pathianni khan tuipuiah ballistic missile an kap chhuak leh tih South Korea military official-te chuan an sawi.
US vice president Kamala Harris-i'n South Korea tlawh turin ruahmanna a siam a, South Korea leh US hian joint drill neih an tum bawk. US aircraft carrier phei chuan SKorea hi a thleng tawh nghe nghe a, chumi hnu lawkah chuan NKorea hian missile hi an kap chhuak a, SKorea lam chuan NKorea missile kah chhuah chu 'inhrosakna' a nih thu an sawi bawk.
UN-in ballistic leh nuclear ralthuam enchhin a khap mek NKorea hian June thla hnuah khan missile a enchhin hi hriat tur a awm tawh lo a, mahse nimin khan SKorea huna zing dar 7-ah missile hi an kap chhuak leh ta a ni.
South Korea military official-te chuan Taechon bulah missile hi kah chhuah a nih thu an sawi a, Pyongyang hmar lam km 100 vela hla aṭangin kah chhuah a nih thu leh km 600 vela thui, km 60 vela sangah an kah chhuah thu an sawi.
Japan coast guard-te pawhin SKorea sipai thuchhuah siam chu thudik a nih thu sawiin, Tokyo defence minister Yasukazu Hamada chuan km 50 vela sangah a thlawh thu a sawi ve bawk a ni. Japan exclusive economic zone pawn, NKorea chhak lamah tuipuiah a tla tih a sawi bawk.