Queen Elizabeth vuina aiin Shinzo Abe vuina a hautak zawk dawn

Japan prime minister hlui July 8-a kum 67 mi nia kahhlum tak, Shinzo Abe vuina chu naktuk hian neih a ni dawn a, Britain lalnu Queen Elizabeth II aiin a vuina senso a tam zawk dawn niin media ṭhenkhat report-ah chuan tarlan a ni.

Shinzo Abe vuina atan hian Japan sorkar chuan yen tluklehdingawn 1.66 vel an hmang dawn a, hei hi Queen Elizabeth II vuina senso aiin a tam zawk niin an sawi. Queen Elizabeth II vuina senso kha yen chuan tld 1.3 niin an chhut.

Tokyo-a hmunpui nei, event organiser Murayama chu vuina buatsaihtu tur niin hautak taka vui a ni tur hi mi tam takin an dodal nghal nghe nghe a ni.

Shinzo Abe vuinaa tel tur hian ram hrang hrang aṭangin mi 700 vel an tel dawn a, chung zingah chuan US vice president Kamala Harris, India prime minister Narendra Modi leh Australia prime minister Anthony Albanese-te pawh an tel.