Myanmar sipai hotuin mipuite ṭangrual turin ngen

Myanmar sipai hotu, General Min Aung Hlaing chuan Rohingya Muslim-te chungchangah an ram mipuite chu ṭangrual turin a ngen.

General Min Aung Hlaing chuan Rohingya-te chu an rama ṭobul nei lo an nih thu sawiin, sipaiten Rohingya helte laka beihpui an thlak mekah mipuite chu sorkar hmalakna thlawp a, lungrualpui turin a sawm.

Myanmar sipaite chuan an ram hmarlam, Rakhine state-a beihpui an thlak mek chu August 25-a police post beitu, Rohingya helte dapchhuahna atan tih an nih thu an sawi. Mahse Rohingya Muslim-te chuan sipaite hian civil mite an bitum tel nia sawiin, tharum thawhna thleng avang hian mi nuai li chuang chu Bangladesh ramah an tlanchhe tawh a ni. Rohingya-te chuan Myanmar sipaite hian civil mi tam tak thatin an khuate an halsak niin an sawi.

Ram hrang hrangte chuan Myanmar sipaite chetdan hi sawiselin, Rohingya an beihnate titawp turin an phut a, Myanmar State Counsellor Aung San Suu Kyi-i pawhin sawisel a tawh phah nasa hle. UN hruaitute chuan sipaiten beihpui an thlak mek chu an rama Rohingya te thenfai an tumna niin an sawi.

General Min Aung Hlaing chuan a official Facebook page-ah Rohingya chungchang hi tarlangin, Rohingya-te chuan khua leh tui anga pawm an phut a, mahse an hnam hi Myanram ram mi an ni ngai lo tih a sawi. Thu dik tak tarlan chungchangah ram mipuite chu an lungrual a ngai a ni, a ti.

Myanmar sorkar chuan beihpui thlak hnua Bangladesh rama tlanchhiate chu helpawl nena inzawmna nei nia puhin, an rama hruai kir leh a tum lo tih a sawi. Information Committee chuan thu­chhuah siamin,”Ramdanga tlanchhiate chu tharum thawhna thlenga inhnamhnawihna nei, man hlauh vanga tlanchhia an ni. Tlanchhe ve lote chauh chu humhim an ni ang”, a ti. Sorkar chuan Rakhine state-ah hian Muslim-te awmna tur relief camp siam a tum a, he hmunah hian helho nena inzawmna neilote chauh awmtir an ni ang, a ti.