Japan-ah typhoon Talim a tleh

Japan ramah Pathianni khan thlipui, typhoon Talim a tleh a, darkar khata km 162-a naa tlehin thlipui hian Japan chhim lama thliarkar pali a nuai a ni.

Thli hian ruahtui a ken tel avangin ruah a sur nasa hle bawk a, chhiatna thlengah mi pahnih an thi a, chin hriat lohin mi pathum an awm bawk. Kagawa-ah leimin in a hnawl avangin pitar kum 86 mi a thi a, Kochi lui liana car pakhat pilah a khalhtu kum 60 ruang hmuh a ni bawk.

Public broadcaster NHK chuan thlipui tleh leh ruahsur avanga chhiatna thlengah hian mi 38-in hliam an tuar niin a sawi. Thli tleh avang hian nimin khan domestic flight 116 cancel a ni a, hmarlam biala bullet train service pawh tihtawp a ni bawk.

Thlipui hian Kysuhu a thlen hmain Okinawan thliarkar a nuai hmasa a, Miyako khawpuiah chuan darkar 24 chuang ruah surin, kum 50 chhung ruah a sur nasat ber a ni.

Japan ram hi thlipuiin a nuai fo a, nikum September thla khan Typhoon Lionrock tleh vangin mi 22 an thi a, thla hmasa khan Typhoon Noru tlehin, mi 51-in hliam an tuar bawk.