Suu Kyi-in human rights palzutna a dem

Myanmar State Counselor Aung San Suu Kyi-i chuan an rama Rohingya Muslim-te chunga tawrhna nasa tak a thlen hnuah, a

ṭum khatna atan ṭawngchhuak a, mihring dikna chanvo palzut a ni chu a dem thu leh, harsatna tawk mekte a tawrhpui thu a sawi.

Nimin khan TV-ah thu sawiin, Suu Kyi-i chuan Bangladesh-a Muslim mi tam tak tlanchhe chungchang chu an ngaihven reng tih a sawi a, Myanmar sorkar chuan human rights palzutna lam reng reng chu a dem tih a sawi a ni.

Myanmar sipaiten an ram hmarlama Rakhine state-a Rohingya hel laka beihpui an thlak hnuah Rohingya mi nuai li chuang chu Bangalesh ramah an tlanchhe tawh a ni. Myanmar sorkar leh sipaite chuan Rohingya hel pawl laka beihpui thlak an nih thu sawi mah se, ramdangte chuan he hun hi an rama Rohingya Muslim-te thenfaina remchangah a hmang niin an puh a, civil mi tam takin sipai kut an tuar a, an in leh khuate halsak an ni bawk nia sawi a ni. Bangladesh rama tlan­chhia Rohingya-te chuan Myanmar sipaite lakah pawngsual, tihhlum leh nghaisak te an tuar nasa hle niin an sawi.

Thawhṭanni khan UK, US, France, Canada leh Australia hruaitute chuan Aung San Suy Kyi-i chu Rohingya te chunga tharum thawhna thleng mek titawp tura hma la turin an nawr a ni.

Suu Kyi-i chuan Rohingya te chunga thil thleng mek chungchangah Myanmar sorkar chuan ram dangten an sawisel leh an endik chu a hlauhthawng lo tih a sawi a, rampawn lama endiktute chu Rakhine state tlawh a, thil thlendan dik tak a hmun ngeia enfiah turin a sawm nghal a ni. Suu Kyi-i chuan, “Sipaite chu beihpui an thlaknaah fimkhur taka che a, pawisawilo civil mite tawrhna leh harsatna thlen lo tura che tura hriattir an ni”, a ti.

August 25-a Rohingya helten police leh army post 30 chuang an beih aṭang khan buaina hi a chhuak ṭan a, Myanmar security force-te chuan Rohingya helho lakah hian beihpui an thlak a ni. Rohingya Muslim-te hi kum tam tak Myanmar-ah hian cheng tawh mah se, Myanmar sorkar chuan a khua leh tui-ah a pawm lo a, citizenship pawh a pe duh lo a ni.