Turkey-in Iraq ramri bulah military drill buatsaih

Turkey chuan Thawhṭanni aṭang khan Iraq ramri bulah military drill a buatsaih.

Iraqi Kurdistan-te chuan independence duh leh duh loh chungchangah September 25 hian mipuite vote lak a tum a, hemi atana an inbuatsaih laiin Turkey sipaite hian nunchan an lo zir a ni. Turkey sorkar chuan Kurdistan independence hi a dodal nasa hle a ni.

Turkish Armed Forces chuan an wesbite-ah thuchhuah siamin, mi­litary drill hi San­liurfa province-a Silopi leh Habur bialah neih a nih thu a tarlang. He bial hi Syria hmarlam, Iraq ramri bula awm a ni a, Kurdish Regional Government-in a mamawh a chawkluhna pawimawh tak, Habur border crossing pawh a awm a ni.

Turkey President Recep Tayyip Erdogan chuan KGR-in independence referendum buatsaih a tum chu thil dik lo tak a nih thu sawiin, Turkey chuan Iraq ram ṭhendarh tuma hmalakna chu a remti dawn lo tih a sawi. Erdogan hian Iraq Prime Minister Haider al-Abadi chu tunkar chhung hian New York-ah meeting neihpui a tum bawk.