Mipuite inpekna a zarah Thi an tlem phah : Donald Trump
United Statespresident Donald Trump chuan mipuite inpekna a zarah an ramah Covid-19 vanga thi an tlem phah thu a sawi.
Trump chuan US-a Covid-19 hri leng chu a ziaawm chho dawn tih a sawi a, mipuite chu pawn chhuak tam loa in lama an tawmim avangin nunna tam tak chhanhim a nih thu a sawi bawk.
"US chuan rahbi thar a kai mek a, mipuite pawh kan him chho zel a, zawi zawiin sumdawnna lamah inkhuahkhirhna pawh kan thlahdul chho zel dawn a ni," tiin Trump chuan a sawi. Covid-19 vaccine pawh US chuan hmuhchhuah vat a tum thu Trump chuan a sawi a, he vaccine hi hmuhchhuah a nih theih nan US-a clinic 90-ah enchhinna neih mek a nih thu a sawi bawk. Trump chuan a ṭha lam zawng zelin thil a kal chhoh thu sawiin, engkim hi la sawi vek a
ṭul hran lo a, hma kan sawn chhohna chu a rawn lang zel ang, a ti.
Hri darhchhuah ṭan dan sawifiah turin China phut
Donald Trump chuan Covid-19 hri darhchhuah dan dik tak chu sawifiah turin China a phut.
US hian China-a Wuhan Institute of Virology laboratory aṭangin Covid-19 hi a darhchhuak tih sawiin, China chu hemi chungchangah hian thil thup tam tak neiah a puh bawk. Mahse US puhna hi China chuan a pha thung.
Arizona-a a zin hmaa White House kawta thuthar thehdarhtute hmaah Trump chuan, "Nakin lawkah US-in he hri hi a rawn chhuah dan dik tak a la tlangzarh ang, kan duh ber chu langtlang taka thil kalpui hi a ni," a ti. Hri leng vanga khawvelin harsatna a tawh mek ang chu a thlen nawn tawh lohna turin, he hri leng chungchangah hian langtlang taka thil ti tura China an duh thu a sawi.
Hetih lai hian khawvel ram hrang hranga mi thiamte chuan Wuhan market-a sa zawrhna aṭanga he virus hi a rawn darh a nih an ring thlangpui a, ramsa aṭanga mihringa inkaichhawn thil a nih an ring bawk.
Nimin thleng kha chuan US-a Covid-19 kai hi mi 1,237,761 an awm tawh a, heng zinga mi 200,669-te enkawl dam tawh niin, he hri vanga thi hi mi 72,275 an awm tawh a ni.