China leh NKorea-in Bungraw phur rel service tir leh ṭan
North Korea leh China chuan Covid-19 hri leng vanga thla nga chhung bungraw phur rel service an tihtawp hnuah nimin aṭang khan an service tir leh ṭan ta.
South Korea media-te chuan nimin khan China border city, Dandong aṭangin North Korea-a Sinuiju-ah bungaw phur rel hi an tlantir leh ṭan niin an tarlang. China leh NKorea hian rel service chungchang hi sawilang lo mah se, SKorea lam chuan ni khatah vawi hnih emaw, vawi khat emaw tlantir a ni ṭhin dawn niin an sawi.
Kum 2020-a Covid-19 hri leng vanga NKorea hotu, Kim Jong-un-a'n an ramri zawng zawng kharna tur thupek a tihchhuah avangin ram pahnih inkara rel service hi titawp a ni. Kumin January thla khan ramri hi hawngin bungraw phur relte pawh an tlan leh a, mahse April thla khan khar a ni leh nghal a ni.
China hi NKorea-in mamawh a chawkluhna pui ber niin, China nena an insumdawn tawnna hi hri leng vangin kum 2021 khan USD mdt 318-ah a tlahniam a, hei hi hri len hmaa an insumdawn tawnna nena chhutin 90% vel zetin a tlahiam a ni.
Hri leng khuahkhirh a tumna avanga NKorea a inlakhran a, ramrite a khar vek avangin an ram economy dinhmun pawh a chhiat phah hle a, ei leh in lamah indaih lohna nasa tak thlengin, ei tur ṭha neih loh avanga harsatna tawk pawh an tam hle.
Hun rei tak an inkharkhip hnuah, NKorea hotu Kim Jong-un chuan thla hmasa khan coronovirus leng chu an hneh ta nia sawiin khuahkhirhna hrang hrang siamte pawh a hlihna tur thupek a tichhuak nghal a ni.