Italy inthlanah right-wing ṭangrualin hnehna an chang ; Hmeichhe PM hmasa ber tur Giorgia Meloni

Italy inthlanpui, Pathiannia neih takah right-wing ṭangrualten hnehna changin, Brothers of Italy party hotu, Giorgia Meloni chu Italy rama hmeichhe prime minister ni thei hmasa ber a ni dawn ta.

Right-wing ṭangrualah hian Matteo Salvini kaihhruai Leagur leh Sivio Berlusconi partyForza Italia-te pawh an tel. Vote tla aṭangin 44% an hmu pha a, Brothers of Italy party bik hian 25.7% an hmu a ni. Meloni kaihhruai Ṭangrual pawl hian Senate-ah seat 114 neiin majority an nei thei dawn a, Chamber of Deputies pawh an thunun thei dawn bawk a ni.

Inthlanah right-wing lam hian hnehna chang mah se, kum 45 mi Meloni kaihhruai sorkar thar siam tur hian kar eng emaw zat buaipui a la ngaih rin a ni thung. Italy president Sergio Mattarella chuan party hrang hrang hruaitute a kawm hnuah, sorkar thar siam tur hian a sawm chauh dawn a ni.

Meloni chuan inthlan result hriat a nih hnua thu a sawina hmasa berah, an hnehna chan chu Italy mipui tan a ni tih sawiin, Italy miten an aiawh turin an thlan a, mipuite chu an phatsan ngai dawn lo tih a sawi.

Italy PM thar tur, Girogia Meloni hian kum 2012 khan Borthers of Italy hi La Russa leh Crossetto-te nen dinin, tunah hian party president a ni mek a ni. Conservative ruh tak, langsar taka LBGT duh lotu niin, kum 2016-a Italy-in mahni anpui kawp phalna a lo siam tawh pawh ennawn duhtu, nau tihtlak phalna siam pawh dodaltu a ni.