Philippines-a broadcasting network lian tihtawp sak

Philippines rama broad­casting network lian leh thiltithei zinga mi, ABS-CBN chu Cong­ress-in a licence a tihnun chhun­zawm sak duh loh avangin National Telecommunications Commission (NTC) chuan titawp turin thupek a pe. 

Media company ABS-CBN hian president Rodrigo Duterte leh a kaihhruai sorkar sawiselna a tichhuak fo a, hei vang hian Duterte thlawptu lam tamna, Congress chuan Thawhlehnia a licence tawp chu a tihnun sak duh ta lo a ni. He thil hian sawisel pawh a hlawh hle. 

An ram huna Thlawhlehni zan dar 8 khan ABS-CBN chuan an hnam hla play-in, an engineer-te hnenah lawmthu a sawi hnuin, an network hi a titawp ta a ni. Thuchhuah siamin, ABS-CBN chuan an ram mipui tam takin TV leh radio  hmanga chanchinthar an hriatna te chu a tawp dawn ta tih sawiin, Covid-19 leng mek avanga mipuite chanchinthar leh thil pawimawh an hriat leh  hmuh a ṭul lai taka network tihtawp sak an nih thu hi a sawi. 

Philippines ah hian Covid-19 kai hi mi 10,000 dawn an awm tling tawh a, mi  600 chuangin an thihpui tawh bawk a ni. 

Foreign Correspondents Association chuan Philippines sorkarin broadcaster licence a tihtawp sak chu an dem thu a sawi a, press freedom tihderthawnna ang hiala an ngaih thu a sawi. 

Kum 2016, June thlaa President dinhmun a chelh tirh aṭang khan Duterte chuan an ram media-te chu a vau fo a, thu dik tawk lo thehdarhah te puhin, journalist-te chu enthlatu leh mi tlaktlai lo ti tein a lo sawi ṭhin a ni. 

ABS-CBN hian President Durtete kaihhruai sorkarin ruihhlo do beihpui a thlak dan sawiselna chu a lo tichhuak fo a ni. He beihpui thlaknaah hian mi 6,600 chuang thah nia sawi a ni. Hei vang hian Duterte pawhin ABS-CBN hi vauin, kum 2019 November thla khan kum 2020-ah paihchhuah an ni tawh dawn tiin a lo sawilang tawh a ni.