Mexico-ah magnitude 7.1-a nain lir a nghing Mi 200 chuang an thi tawh

Mexico ramah Thawhlehni zan khan magnitude 7.1-a nain lir a nghing a, hriat theih chinah mi 224 an thi tawh a, mi dang tam takin hliam an tuar.

US Geological Survey (USGS) chuan lirnghing inṭanna hi Puebla state-a Atancingo chhimchhak lam, km 8 vela hla niin a sawi. Hei hi Mexico City aṭanga km 120 vela hla a ni.

Lirnghing vang hian Mexico City leh a chhehvel state-ah building eng emaw zat a chhia a, central Mexico-a school pakhat chimin zirlai naupang 22 a delhhlum.

Civil protection service director, Luis Felipe Puente chuan lirnghingin chhiatna a thlen avanga thi report an dawn hi nimin chawhnu lam thleng khan mi 149 an tling tawh tih a sawi. Heng zinga mi 117 chu Mexico City ami niin, Morelos state-ah mi 55 an thi bawk.

President Enrique Pena Nieto chuan thi zingah Mexico City chhim lam, Enrique Rebsamen School chim vanga thi, naupang 22 an tel tih a sawi a, he school chimin a delh zirlai 38 te chu an chin hriat a la ni lo tih a sawi bawk.

Mexico City international airport chuan chhiatna thleng vang hian service a titawp lailawk a, airport leh a chhehvelte lirnghing hian a tichhia em tih enfiah mek a ni. Mexico City mayor Miguel Angel Mancera chuan khawpui chhung bikah pawh lirnghing vang hian in 44 a chim niin a sawi a, in chimin a delhte chhanchhuah leh in chim thenfai hnate thawh nghal a nih thu a sawi.

Tun thla tir lam khan Mexico chhim lamah magnitude 8.1-a nain lir a lo nghing tawh a, mi 98 an thi a ni.

Mexico rama lirnghing thleng rapthlak ber chu kum 1985, September 19 kha niin, hemi ṭum hian mi 10,000 dawn an thi a ni.