Hurricane Maria-in Virgia Islands pan

Thlipui, Hurricane Maria chuan Carribean-a Dominica thliarkar a nuai hnuah US Virgin Islands leh Puerto Rico lam a pan. Tun thla chhunga thlipuiin Carribean bial a nuai ṭum hnihna a ni.

Thawhṭanni zan khan thlipui hian Carribean khawchhak lama Dominica thliarkar hi na takin a nuai a, chhiatna nasa tak a thlen a ni. Thlipui hi hlauhawm lam tehnaa Category 5-a naah chhoi, darkar khat km 250-a chakin a tleh a, Dominica thliarkar hi a nuai a ni.

Dominica Prime Minister Roosevelt Skerrit chuan thlipui hian thingkung tam tak a len thluk bakah, chenna-in pawh a len chhe nasa hle tih a sawi. PM official residence chung pawh a la tel a ni.

Hurricane Maria nat lam hi a tlahniam lo a nih chuan kum 85 chhunga Puerto Rico nuaitu thlipui na ber a ni dawn a ni. Kum 1932 khan Category 4 thlipui tleh chuan US thliarkar hi a lo nuia tawh a ni. Puerto Rico governor Ricardo Rossello chuan thliarkar mipuite chu thlipui tleh tur hian lo inbuatsaih turin a hrilhlawk a ni.

Mi 55,000 chenna, US Virgin Islands Governor Kenneth Mapp pawhin mipuite chu an theih anga lo inbuatsaih turin a ti a, thlipui tleh avang hian hun eng emaw chen chu power supply pawh a awm loh phah dawn tih a sawi. Thawhlehni zing dar 10 aṭang khan curfew puan a ni bawk.