Japan-ah security law duh lohna lantir

Japan Parliament-in kum hnih liam taa security law a siam duh lohna lantirin Thawhlehni zan khan Tokyo-ah mi tam takin kawng an zawh. Security law siam hian sawisel a hlawh hle a ni.

Lungawi lohna lantirte hi Parliament building kawtah an kalkhawm a, banner-te kengin security law chu ṭhiat tura sorkar an phutna te, Prime Minister Shinzo Abe-a bang tura an phutna thuziakte an keng a ni.

Japanese Communist Party hotu, Kazuo Shii chuan security law hi dinhmun hlauhawm taka Japan hnuklut theitu a ni thu sawiin, ṭhiah vat a ngai a ni,a ti. Prime Minsiter Abe-a’n parliament lower house ṭhiat a, inthlanpui nei tura a rawtna chu a sawisel bawk a, PM thiltih chu an puhna laka tlanchhiatna a ni, a ti.

Social Democratic Party deputy head, Mizuho Fukushima chuan PM Abe-a kaihhruai sorkar chuan tihluihna hmanga security law a siam hnuah, an ram danpui pawh ennawn leh a tum mek niin a sawi. Hei hi ram danpui-a Article 9 bawhchhiatna a ni a, ngaihdam theih a ni lo, tiin a sawi.