Trump-a’n UN General Assembly-ah thu a sawi

US President Donald Trump chuan Thawhlehni khan New York-a United Nations General Assembly-ah thu a sawi a, US President a nih anga thu a sawina hmasa ber a ni.

President Trump hian North Korea, Iran leh a nuclear deal chungchangte a sawilang a ni. NKorea hotu, Kim Jong-un chu ‘rocket man’ tia sawiin, President Trump chuan US leh a thawhpui ramte NKorea laka inveng ngai khawpa a siam a nih chuan NKorea chu tihchhiat vekah a vau. NKorea chu UN innghahna thupuite bawhchhe vekah puhin, US chu dawhtheihna ngah tak ni mah se, che lo theiloa a nawr lui a nih chuan NKorea ram tihchhiat vek mai loh chu thlan tur dang an nei dawn lo tih a sawi. Rocket man chuan amah leh a ram tihchhiatna tur kawng a zawh mek a ni, a ti.

Iran sorkar pawh democracy kawra hmanga an rama dictatorship thupah a puh a, an thiltih avang hian an ram chu tharum thawhna, thisen chhuah leh buaina chhuahna rama siamah a puh. Iran nuclear deal chu khawvela inremna siam tawh zinga chhe ber nia sawiin, Trump chuan he inremna hi US tan pawha thil zahthlak tak a ni tih a sawi. Iran chuan a ram leilung hausaknate chu a ram mipuite dinhmun chawisanna tura hman aiin, Muslim mi pawisawilo te tihlum a, Arab leh Israel ramte bei ṭhintu Hezbollah helpawl leh firfiak pawl dang te ṭanpuina atana hmangah a puh bawk.

President Trump chuan ram hrang hrang te chu a fak a, midangte ṭanpui hna an thawh dan chu a fakawm hle a ni, a ti. UN leh Farican Union chuan Africa ram buaina chingfel a, boruak ṭha a awm theihna turin tha an thawh nasa hle tih a sawi bawk. US pawhin khawvel hmun hrang hranga chhawmdawl ngaite puihna kawngah hma a hruai chhunzawm zel a, South Sudan, Somalia, Nigeria leh Yemen ram mipuiten ṭam an tuar tur venna kawngah te, chhawmdawlna pekna kawng­ahte hma ala reng a ni, a ti.