Lirnghing tuarte chhanchhuah hna thawh chhunzawm
Mexico ramah magnitude 7.1-a nain lir a nghing a, chhiatna tawkte chhanchhuah leh chhawmdawl hna chu ngawrh taka thawh mek a ni.
Thawhlehni zana Mexico ram laili-a lirnghing vanga thi zat hriat theih chu mi 239 an ni tawh a, in chim hnuaiah mi tam tak an tang bawk. Lirnghing hian in tam tak a sawi chhia a, in chim hnuaia aṭang hian mi tam tak chhanchhuah an ni tawh bawk.
President Erinque Pena Nieto chuan lirnghing vanga chhiatna thlenna hmunte hi Nilaini khan a tlawh kual nghal a, harsatna tawkte chu an tuarpui thu hrilhin, chhiatna thleng avanga thi chu ram pumah ni thum chhung sun an nih tur thu a sawi.
Mexico City hmun tam takah nimin thleng khan power supply an la nei lo a, mahse an ngaih pawimawh hmasak ber tur chu in chim hnuaia tangte chhanchhuah leh, hliam tuarte enkawl a nih thu President chuan a sawi. President Nieto chuan Mexico mipuite chuan tunhma lam pawhin lirnghing vangin hun harsa tak tak an lo hmachhawn tawh a, chhiatna thleng chungchanga hma lak dan te pawh an lo hre tawh niin a sawi.
US President Donald Trump chuan Mexico President hi biain, an ramin chhiatna a tawhah an tawrhpui thu leh, chhanchhuah leh chhawmdawl hna thawhnaah a theih anga puih an inhuam thu a hrilh.
Lirnghing vang hian Mexico khawpui, Mexico City-ah mi 100 an thi a, Morelos-ah mi 69, Puebla state-ah mi 43, Mexico state-ah mi 13 an thi. Guerrero state-ah mi pali leh Oaxaca state-ah mi pakhat an thi bawk. Mexico City-ah hian hliam tuar 800 chuang an awm bawk a ni.