Spain PM-in Catalonia referendum titawp turin ngen

Spain Prime Minister Mariona Rajouy chuan national TV-a thu a sawiah, Catalan inlakhran duhtuten October 1-a Catalonia independence duh leh duh loh chungchanga an bial mipuite vote lak an tum chu titawp turin a ngen.

PM Rajoy chuan Catalonia bial sorkar hnenah, inlakhranna leh sorkar laipui thu awi loh zawnga hma lak an tumna chu bansan turin a ngen a ni.

Spain sorkar chuan Catalonia bial inlakhran hi a remti lo a, Catalonia referendum buatsaih tum pawh chu dan kalh a ni tiin, dan a tum a, vote thlakna tur hmanruate pawh a mansak tawh a ni. Police-te chuan Nilaini khan Catalan khawpui, Barcelona chu an dap kual a, hei hi duh loin mi tam takin lungawi lohna an lantir zui a ni.

Catalan parliament-ah hian Spain aṭanga inlakhran duh lamin ro an rel mek a, tun thla tir khan independence chungchanga mipui ngaihdan lakna tur, referendum buatsaihna tur bill putluh chu a lo pass tawh a ni.