Kim Jong-un-a’n rilru buaiah President Trump a puh

North Korea ram hotu, Kim Jong-un chuan US President Donald Trump chu rilru buai nia sawiin, ram hotu lu ber ni tura tling loah a puh. Trump hian NKorea ram a vauna man a hmu dawn a ni, a ti bawk.

Kim chuan Trump chu misual, buaina chawh chhuah chak gangster niin nimin khan a sawi a ni. Kim-a’n he thu a sawi hnu lawk hian North Korea foreign minister chuan Pacific Ocean-ah hydrogen bomb enchhinna tur an ruahman leh dawn niin a sawi.

NKorea ram hotu thusawi hi Korean Central News Agency chuan a tarlang a, hei hi Thawhlehni-a UN General Assembly-a President Trump-a thusawi a chhan letna a ni. Trump hian UNGA-a thu a sawiah, US leh a thawhpui ramte chu beih an nih chuan NKorea chu an tihchhiat vek tur thu a sawi a, Kim Jong-un-a chu ‘rocket man’ tia koin, amah leh an ram chhiatna tur kawng zawh mek niin a sawi.

Kim Jong-un chuan Trump-a thusawi chu rilru lama buaina nei thusawi dan a ni tiin, a vauna chuan tihhlauh aiin kawng dik a zawh mek a ni tih a hriattir zawk a, a tawp thlengin a kawng zawh tur chu a dik a ni tih a hriattir zawk niin a sawi. Trump-a a chhan let dan tur pawh a ngaihtuah uluk hle tih sawiin, a rin phak bak aia nasain chhanna hi a hmulet dawn tih a sawi. Trump chuan khawvel hmuhah amah leh an ram a hmuhsitna a lantir a, hei hi an ngai thutak hle a, na taka chhanlet dan an ngaihtuah dawn tih a sawi.

President Trump hian Ningani khan NKorea-in nuclear missile program a kalpui avanga hrekna na zawk siamna tur thupekah a hming a ziah hnan a ni. He thupek thar hmang hian North-in nuclear program a kalpuina kawnga sum lama puitute chu hrek an ni dawn a, hrek tur zingah hian NKorea textile, fishing, information technology leh manufacturing industry-te pawh an tel.