Sudan president-i’n ralthuam pe lut turin mipuite ngen

Sudan President Omar al-Bashir chuan Darfur biala chengte chu an ralthuamte sorkar hnena pe lut turin a ngen.

South Darfur State khawpui, Nyala-a thu a sawinaah, President Bashir chuan sorkarin tihluihna hmanga an ralthuam kawlte a laksak hmain, mipuite chu an ralthuam neihte thuneitute kuta pe lut mai turin a ngen a ni. Ralthuamte chu mipuite kutah pek luh vek chu a ṭha zawk tih sawiin, hengte hi an ram leh mipuite venhimna atan chuah hman a ni dawn a ni, a ti.

Kum 2003 aṭanga Darful biala tualchhung buaina chhuak vanga harsatna thleng mek chinfel tumin sorkar chuan hma a la zel tih President chuan a sawi. Mi tam tak chu himna zawnga tlanchhiain, camp-ah an khawsa a, ramdangte chhawmdawlna ringin an awm mek a, hengte hi siamṭhat an tum tih a sawi.

Sudan sorkar chuan official-in Darfur biala ralthuam awm zat hi a chhinchhiah lo a, mahse UN chuan civil mi leh helpawl hrang hrang kutah silai maktaduai hnih vel a awm niin a sawi. Sudan sorkar chuan August aṭang khan Darfur biala ralthuam lakkhawm hna hi a kalpui ṭan a ni.