Catalonia referendum : Court-in organiser-te pawisa chawitir

Spain Constitutional Court chuan danin a khap chunga Catalonia bial indan duh leh duh loh chungchanga mipuite vote lakna tur buaipuitu, Catalan official-te chu ni khatah dollar 14,300 zel a chawitir dawn tih a sawi.

Catalonia parliament chuan October 1-a referendum buatsaihna tur bill hi a lo pass tawh a, mahse hei hi Spain sorkar chuan dodalin Constitutional Court-ah a thlen a, court chuan dan kalh a ni tiin vote hi la lo turin a ti a ni. Mahse Catalan hruaitute chuan vote thlak tur hi kaltlangpui an tum thu an sawi.

Police-te chuan October 1-a vote lakna tura inbuatsaihna te chu dangin, hmanrua eng emaw zat an mansak tawh bawk. Catalan politician ṭhenkhat pawh man an ni bawk. An mi mante chhuah phut hian Barcelona court pawn lamah mi tam tak an pungkhawm a ni.

Court chuan dan kalha referendum neihna tur buaipuitu, senior official parukte chu ni khatah dollar 14,300 zel chawitir an nih tur thu leh, official dang 16-te pawh dollar 6,000 zel chawitir an nih tur thu a sawi.