UK beihpui thlaknaah IS firfiak 3,000 thi tawh

Britain Royal Air Force-te’n kum thum kalta chhunga Iraq leh Syria rama Islamic State (IS)-te laka beihpui an thlaknaah firfiak 3,000 an thi tawh niin Britain sorkar chuan a sawi.

Defence Secretary Michael Fallon chuan British sipaiten beihpui an thlak, ‘Operation Shader’ kum thumna puala Iraq a tlawhnaah hei hi a sawilang a ni. UK Ministry of Defence (MoD)-in a tarlan danin kum 2015 December thla aṭanga British sipaite beihpui thlaknaah hian Iraq ramah firfiak 2,684 leh Syria ramah 410 an thi tawh a ni. British sipaite hian IS firfiakte awmna hmun hi ṭum 1,500 chuang an kap tawh a, firfiakte bei lettu Iraq sipai 60,000 dawn chu training an pe bawk a ni. Beihpui thlaknaah hian Britain Army, Navy leh Air Force sipai 1,400 chuang an tel a, an campaign hi a la zo mai dawn lo tih Fallon chuan a sawi bawk.