North Korea America mite tawrhna a thlen chuan Trump-a vang a ni ang

North Korea Foreign Minister Ri Yong-ho chuan American mite beih an nih pawhin a mawhphurtu ber chu US President Donald Trump a nih tur thu a sawi.

Minister Ri chuan Trump hian NKorea hotu lu ber, Kim Jong-un chu na taka sawiselin, hmusit takin ‘rocket man’ tiin a ko a, hei vang hian an rocket hmanga US ram laili kah chu pumpelh theih a ni tawh lo a ni, a ti. Trump-a’n chhiatna tur kawngzawh mek nia Kim-a a sawi chungchang pawh chhangin, Kim-a ni loin Trump-a zawk chu amah leh a ram chhiatna tur kawng zawh mek chu a ni, a ti.

Hetihlai hian kar kalta Inrinni khan US bomber leh fighter jet-te chu North Korea khawchhak lama thlawhkual tir an ni a, hei hi American sipaite theihna lantirna pakhat a nih thu Pentagon chuan a sawi. Inrinni-a bomber-te thlawh tirna hi US figher leh bomber aircraft-te’n tun kum zabi chhunga Demilitarised Zone (DMZ) hmarlama an la thlen hlat berṭum a nih thu Pentagon thupuangtu Dana White-i chuan a sawi. An thiltih hi an ram vauna chhan letna tura President-in sipai chakna hrang hrang hman tur a ngahzia lantirna leh hriattirna a nih thu a sawi.

Kar kalta Inrinni khan NKorea nuclear test-na hmun bulah lei nghawr na tak hriat a ni a, NKorea hian nuclear a enchhin leh nia sawi a nih hnuah, China seismic service chuan nuclear test vang ni loin, lirnghing zawk niin a sawi.

China Earthquake Netwokrs Center (CENCA) chuan thuchhuah siamin, nuclear test-in lei a nghawr chet ni loin, lirnghing zawk a nih thu a tarlang.

September 3-a NKorea-in nuclear test a neih khan, China ramri bul vela lei chu magnitude 6.3-a nain alo nghawr nghing tawh a ni. Monitoring group-te chuan NKorea nuclear test hnuhnung ber hi kiloton 250 vel zet niin an chhut a, hei hi kum 1945-a Hiroshima khawpui tichhetu, US bomb ai khan a let 16 zetin a lian a ni. Nuclear test a neih avang hian United Nations Security Council chuan NKorea hrekna thar a siam phah a, a oil lakluh theih zat thlengin khuahkhirhna siam a ni. Zirtawpni khan US chuan NKorea ram hrekna na zawk a siam thar leh bawk.

NKorea ram thlawptu ber ni ṭhin, China pawhin UNSC hrekna thar siam hi a zawm a, NKorea hnena oil a hralh

ṭhin pawh bithliah siamin, textile product pawh NKorea aṭang hian a la lut tawh dawn lo a ni. NKorea in rampawn lama sumdawnna a kalpui zinga 90% hi China nena an insumdawnna a ni a, China-in UNSC hrekna a zawm dawn avang hian NKorea chuan a sum lakluh kawngah pawh nghawng a nei lian dawn hle a ni.