Syria sipaiten IS kut aṭangin khaw 44 la let

Syria sipaite leh an thawhpuite chuan kar hnih chhungin Islamic State (IS) firfiakte kut aṭangin khaw 44 an lalet niin an sawi.

State news agency SANA chuan September 10 aṭang khan Syria ram lai leh khawchhak lama khaw 44 chu fir­fiakte kut aṭang hian sipaiten an la let tih a sawi a, an inbeihnaah IS firfiak eng eng emaw zat an thi a, an center 19 pawh tihchhiatsak an ni tih a tarlang.

Syria sipaite hian Homs, RAqq, Hama leh Deir al-Zour bialah IS firfiakte nuaibo tumin beihpui an thlak mek a ni.

Hetihlai hian US kaih­hruaia ṭangrual ramten kum 2014-a Syria rama IS-te laka beihpui an thlaknaah civil mi 2,617 an thi tawh niin monitor group, Syrian Observatory for Human Rights chuan a tarlang. Civil mite thihna tamna bial chu Hasakah, Raqqa, Aleppo, Idlib leh Deir al-Zour bialah a ni. US kaihhruai ṭangrual ramte hian Syria hmar lama IS firfiak beitu, Kurdish fighter-te chu thlawhtheihna hmangin an pui ṭhin a ni. Syria sorkar chuan a ram chhunga ṭangrual ramte chetdan chu dan kalh a ni tiin, UN hnenah pawh ṭangrual ram hi ṭhiat turin a ngen tawh a, civil mi tam tak thihna a thlen phah niin a sawi a ni.