New Zealand inthlanah sorkar siam thei awm lo

New Zealand Parliament inthlan chu kar kalta Inrinanni khan neih a ni a, party mala sorkar siam thei tura chak an awm lo.

Inthlan result hi nimin khan tihchhuah a ni a, rorellai National Party chuan vote hmu tam berin, vote tla aṭangin 46% a hmu a, member 120 awmna Congress-ah seat 58 a nei pha a ni. Eptu party lian ber Labor Party chuan vote 35.8% hmuin, seat 45 a nei pha bawk. New Zealand First Party chuan seat kua a la pha a, ṭangrual sorkar siamna kawngah a pawimawh dawn hle a ni.

Labor Party thawhpui, Green Party chuan seat sarih a la a, New Zealadn First Party hi an thawhpui theih chuan sorkar an siam thei ang.

Hetih lai hian New Zealand First Party hotu, Winston Peters chuan eng party nge an thawhpui dawn tih a la sawi lo. Ṭangrual siam tur a nih theih nana party-te inbiakna hian hun eng emaw chen a la awh rin a ni.