US-in travel ban a siamah NKorea telh
US chuan an rama zin luh khapna, travel ban a siam zingah ram pathum - North Korea, Venezuela leh Chad ram a telh thar leh. He thupek hi October 18aṭanga hman ṭan a ni ang.
US President Donald Trump chuan Muslim ram - Iran, Libya, Syria, Yemen, leh Somalia aṭanga an rama zin khapna thupek chu alo siam tawh a, Pathianni khan ram pathumte hi a telh belh leh a ni.
Pathianni zan khan President Trump chuan thuchhuah siamin, America mipuite himna chu an ngaih pawimawh ber a nih thu sawiin, an ram tana him tawk lo nia an ngaih te chu an luh an remti dawn lo tih a sawi. Venezuela laka khapna a siam hian sorkar official leh an chhungte chauh a huam thung dawn a ni. US travel ban siam hian sawisel a hlawh hle a, a khap ramte hi Muslim tamna ram vek an nih avangin Muslim ho thliarhranna angah ngaiin President Trump pawhin beih a tawk nasa hle a ni.
White House chuan thuchhuah siamin, NKorea chuan eng kawng mahin US sorkar chu a thawhpui duh lo a, hei vang hian an ram mipuite chu US-a an zin khapsak an ni ve ta a ni, a ti. Chad hi firfiakte doletna kawnga US thawhpui ni mah se, firfiak kaihhnawih thil pawimawhte engmah a hriattir duh loh avangin list-ah hian telh a ni a, hei vang hian Chad ram mipuite hnena tourist visa pek chu tihtawp a ni bawk. Venezuela ram khapna erawh hi chuan a mipui nawlpui a huam tel lo a, sorkar official leh an chhungte chauh a huam dawn a ni.