Iraq-a Kurdistan bialah independence vote la

Iraq-a Kurdistan bialah nimin khan independence duh leh duh loh chungchangah mipui vote lak a ni.

Iraq sorkar chuan referendum neih tur hi sawiselin, ṭhulh turin alo ngen tawh a, mahse Kurdish bial hi automnomous a nih avangin ṭhulh turin a nawr lui thei lo a ni.

Khawthlang ramte pawhin Kurdistan inlakhran tum chungchang hi an sawisel a, mipui vote lak hian buaina a chawhchhuah thar leh an hlauh thu an sawi a, hei hian Islamic State (IS) firfiak beihletna kawngah nghawng ṭha lo zawk a neih an hlauh thu an sawi bawk.

Iraq Prime Minister Hai­der al-Abadi chuan vote lak chu ram danpui kalh a nih bakah, an ram boruak tichhe thei a nih thu a sawi a, an ram inpumkhatna turin theih­tawp an chhuah zel dawn tih a sawi. Kurdish biala international border post-a thuneihna chu sorkar laipui kutah hlan turin a ti bawk.

Hetih lai hian Kurds hruai­tu Massoud Barzani chuan indepedence neih chu an bial mipuite himna kawng awmchhun a nih thu a sawi. Vote lak a nih avang chuan IS firfiakte an beihletna kawngah harsatn a awm phah loh tur thu a sawi.

Iraqi Kurdistan hi autonomous region niin Kur­distan Regional government enkawlna hnuaia awm a ni a, kum 2005 khan Iraq constitution chuan a pawm a ni. Kurdistan biala cheng hi Iraq ram mipui 15-20% vel an ni. Kurdish fighter, Peshmerga tihte chuan Syria leh Iraq-a IS firfiak an bei mek a, US-in a thawhpui bawk a ni. Mahse US chuan Kurdistan bial independence tumna hi a thlawp lo a, ram dang zinga thlawptu awmchhun chu Israel chauh a ni.