Iran-a tualchhung buaina chhuakah mi 76 thi tawh

Iran-a buaina chhuak mekah ni 11 chhungin Iranian security force-te chuan lungawi lohna lantirtu zinga mi 76 vel an that tawh tih activist-te chuan an sawi.

Norway-a hmunpui nei, Iran Human Rights (IHR) chuan buaina chhuak tipunlun zawnga tharum thawhna leh silai hmetpuaktuah thuneitute chu a puh. State media chuan mitthi zat hi mi 41 angin an tarlang a, heng zingah hian venhim lam hnathawk pawh telin, an thihchhanah buaina chawk chhuaktute a puh thung.

Mi za tel man an ni tawh a, an zingah hian journalist 20 an tel. "Lungawi lohna lantirtu mipuite nghaisakna leh sawisak hi ngaih thutak tur a ni a, mipui hawi zawnga silai lekchhuah hrim hrim hi international crime a tling phak a ni. Khawvel hian Iran mite'n dikna an chan theihna atan kan venhim a ngai a ni," tiin IHR director Mahmood Amiry-Moghaddam chuan a sawi. UN human rights office pawhin thuneitute chetdan chuan ngaih a tih ṭhat loh thu sawiin, zalen tak leh buaina awm loa lungawi lohna an lantir theihna chu zahsak turin a chah.

September 17-a Mahsa Amini vuiliam a nih hnu khan, sorkar dodalna hi Iran-a khaw 80 chuangah lantir a ni. Kum 22 mi, an khawpui hmar thlang lama Saqez-a cheng, Kurdish nula hian September 13 khan Tehran a tlawh laiin morality police officer-te chuan hijab emaw headscarf emaw hmanga a lu a tuam loh avangin an man a ni. Zilhna dawng tura detention centre panpui a nih hnuah harsatna tawk chhoin, damdawi-inah nikhaw hre loa ni thum a awm hnuah a thi zui a ni.

Police-te sawidanin, Amini hi a lung lam ṭhat tawk loh vanga boral a nih thu an puang a, mahse a chhungte chuan hei hi pawm loin, police officer-te kut tuara thi a nih thu an sawi thung. Amini thihna avang hian morality police leh hijab dan chuan sawisel a hlawh nghal hle a, Iran-a Shia Muslim rorelnain kum tam tak hnua chona hautak ber a hmachhawn mek a ni.