Thuthang leng vel karah mipui hmaah Xi Jinping a inlan

China president Xi Jinping chuan Thawh­lehni khan Beijing-ah exhibition a hmanpui tih state television chuan tarlangin, September thla laihawla Central Asia tlawha a zinchhuah hnua mipui hmaa a rawn inlan leh vawi khatna a ni a, house arrest-a hren mek nia thuthang awm chu a rawn thaireh a ni.

President Xi hi Uzbekistan-a summit an neih zawha China-a rawn let hnu hian vantlang hmuhah a la inlan leh lo a, Beijing-ah sipai thununna hnuaiah a awm mek tih thuthangte pawh a awm hman hial a ni.

Xi hi a term thumna hmang turin thuneihna a chan chhun­zawm leh dawn niin a lang. Kum 10 liamtaa rorellai party general secretary ni a, China ram hotu dinhmun a luah aṭang khan a thuneihna hi a sawhngheh belh zel. Kum 2018 khan President dinhmun, term hnih chin chelh theihna dan chu a tibo a, hei vang hian kum 69 mi Xi hian President term thumna a chelh chho leh ngei rin a ni.

Kum 10 thuneihna a chelh tawh chhung hian party chhung­ah ngei pawh eirukna tihtawp tumin hma a la nasa a, hetih lai hian ṭhenkhat chuan hei hi politics lama a khingpuite paihthlakna tur ruahmanna chi khat niin an puh thung.